ശബരിമല സ്വർണപ്പാളി വിവാദത്തിൽ തിരുവിതാംകൂർ ദേവസ്വം ബോർഡിനെതിരെ വിജിലൻസ് വിഭാഗം ഹൈക്കോടതിയിൽ സമർപ്പിച്ച അന്വേഷണ റിപ്പോർട്ടിന്റെ വിശദാംശങ്ങൾ പുറത്ത് വന്നു .ഉണ്ണികൃഷ്ണൻ പോറ്റി ചതിയൻ എന്നും ദേവസ്വം ബോർഡിനെ ചതിച്ച് അന്യായ ലാഭം ഉണ്ടാക്കണം എന്ന ഉദ്ദേശ്യമുണ്ടായിരുന്നു എന്ന് ആണ് റിപ്പോർട്ടിൽ വിജിലൻസ് വിഭാഗം വ്യക്തമാക്കുന്നത് .
ശബരിമല ശ്രീകോവിലിന് സമീപമുള്ള ദ്വാരപാലക ശില്പങ്ങളിലും തെക്കു-വടക്ക് മൂലകളിൽ ഘടിപ്പിച്ചിട്ടുള്ളതുമായ സ്വർണ്ണം പൊതിഞ്ഞ ചെമ്പ് തകിടുകൾ കൈവശപ്പെടുത്താനാണ് ഉണ്ണികൃഷ്ണൻ പോറ്റി ശ്രമിച്ചത്.
തകിടുകൾ അറ്റകുറ്റപ്പണികൾ ചെയ്ത് പുതുക്കിത്തരാമെന്ന് ദേവസ്വം അധികൃതർക്ക് വാഗ്ദാനം നൽകി ഉണ്ണികൃഷ്ണൻ പോറ്റി 2019 ജൂൺ17ന് അപേക്ഷ സമർപ്പിച്ചു. ഇതിനുപിന്നാലെ, തിരുവിതാംകൂർ ദേവസ്വം ബോർഡ് ജൂലൈയിൽ ഉത്തരവിറക്കി. ജൂലൈ 19,20 തീയതികളിൽ അർദ്ധരാത്രിയിലാണ് ദേവസ്വം അധികൃതർ ഈ തകിടുകൾ ഇളക്കിയെടുത്ത് ഉണ്ണികൃഷ്ണൻ പോറ്റിയെ ഏൽപ്പിച്ചത്.
ദ്വാരപാലക ശില്പങ്ങളിലെ പാളികളും തെക്കുവടക്ക് മൂലകളിൽ ഘടിപ്പിച്ചിരുന്നതുമായ തകിടുകളുടെ മൊത്തം തൂക്കം 42.800 ഗ്രാം (42 കിലോ 800 ഗ്രാം) ആയിരുന്നു. ശബരിമലയിൽ നിന്ന് ചെന്നൈയിലെ സ്മാർട്ട് ക്രിയേഷനിലേക്ക് കൊണ്ടുപോകുന്നു എന്ന് പറഞ്ഞിരുന്ന തകിടുകൾ ഉണ്ണികൃഷ്ണൻ പോറ്റി ആദ്യം കൊണ്ടുപോയത് ബാംഗ്ലൂരിലേക്കാണ്. ബാംഗ്ലൂരിൽ ഉണ്ടായിരുന്ന ഈ പാളികളുമായി അദ്ദേഹം പിന്നീട് പോയത് ഹൈദരാബാദിലേക്കാണ്. ഓഗസ്റ്റ് 29നാണ് ദ്വാരപാലക പാളികൾ ചെന്നൈ സ്മാർട്ട് ക്രിയേഷൻസിൽ എത്തിച്ചത്. അവിടെ എത്തിച്ചത് യഥാർത്ഥ പാളികളാണോ അതോ ഡ്യൂപ്ലിക്കേറ്റാണോ എന്ന കാര്യത്തിൽ വ്യക്തതയില്ല. ചെന്നൈയിൽ വെച്ച് 394.900 ഗ്രാം സ്വർണം മാത്രമാണ് പൂശിയത്. അതിനുശേഷം ബാക്കി സ്വർണം കൈവശപ്പെടുത്തി എന്ന് റിപ്പോർട്ടിൽ പറയുന്നു.ഏറെ മൂല്യവും പരിപാവനവുമായ ശബരിമല ദ്വാരപാലക ശില്പങ്ങളും തകിടുകളും ചെന്നൈ, ബാംഗ്ലൂർ, കേരളം എന്നിവിടങ്ങളിലെ പല വീടുകളിലും ക്ഷേത്രങ്ങളിലും യാതൊരു സുരക്ഷയുമില്ലാതെ കൊണ്ടുചെന്ന് പൂജ നടത്തി ലാഭം ഉണ്ടാക്കി എന്നും വിജിലൻസ് എസ്.പി. റിപ്പോർട്ടിൽ ചൂണ്ടികാണിക്കുന്നു. സെപ്റ്റംബർ ഒന്നിനാണ് പുതിയ പാളി സന്നിധാനത്ത് തിരികെ എത്തിച്ചത്. സ്വർണം പൂശി തിരികെ നൽകിയപ്പോൾ തകിടുകളുടെ തൂക്കം 38 കിലോ 258.1 ഗ്രാമായി കുറഞ്ഞു.
അന്വേഷണത്തിൽ, ഉണ്ണികൃഷ്ണൻ പോറ്റി ശബരിമലയിൽ സ്പോൺസർഷിപ്പിലൂടെ ചെയ്ത മറ്റ് പ്രവർത്തികളും സംഭാവനകളും വിജിലൻസ് കണ്ടെത്തിയിട്ടുണ്ട്. ശബരിമലയിലെ കേടായ വാതിൽ മാറ്റി പുതിയ വാതിൽ നിർമ്മിച്ച് സ്വർണം പൂശി നൽകി. എന്നാൽ, ഈ നിർമ്മാണ പ്രവർത്തിയുടെ യഥാർത്ഥ സ്പോൺസർ കർണാടക ബെല്ലാരി സ്വദേശിയായ ഗോവർധനൻ എന്ന ബിസിനസുകാരനാണെന്ന് വെളിപ്പെട്ടു. ശ്രീകോവിലിന്റെ കട്ടളയിൽ പൊതിഞ്ഞ ചെമ്പുപാളികൾ സ്വർണം പൂശി നൽകിയതിന്റെ യഥാർത്ഥ സ്പോൺസർ ബാംഗ്ലൂരിൽ സ്ഥിരതാമസക്കാരനായ മലയാളി അജികുമാർ ആണെന്നും വ്യക്തമായി. 2025 ജനുവരി ഒന്നാം തീയതി അന്നദാനം, പടിപൂജ, ഉദയാസ്തമന പൂജ, കളാഭിഷേകം എന്നിവ ഉണ്ണികൃഷ്ണൻ പോറ്റി ശബരിമലയിൽ നടത്തി. ഇത് മോഷണം നടത്തി നേടിയ ലാഭത്തിന് പ്രത്യുപകാരമായിട്ടായിരിക്കാം എന്ന് റിപ്പോർട്ടിൽ സൂചിപ്പിക്കുന്നു.
ഉണ്ണികൃഷ്ണൻ പോറ്റിയുടെ പ്രവർത്തികൾ ഭാരതീയ ന്യായസംഹിതപ്രകാരം ശിക്ഷാർഹമായ ക്രിമിനൽ കേസാണെന്നും അന്വേഷണം നടത്തേണ്ടതാണെന്നും റിപ്പോർട്ടിൽ പറയുന്നു. 2019 കാലഘട്ടത്തിൽ ഈ വിഷയവുമായി ബന്ധപ്പെട്ട ഉദ്യോഗസ്ഥരുടെയും ബോർഡ് അധികൃതരുടെയും (ദേവസ്വം ബോർഡ് അംഗങ്ങളും പ്രസിഡന്റും അടക്കമുള്ളവർ) പങ്ക്, പ്രേരണ, ഗൂഢാലോചന എന്നിവയും അന്വേഷിക്കണമെന്നും എസ്പി റിപ്പോർട്ടിൽ ആവശ്യപ്പെടുന്നു.
